Senegal

Post vom 28.01.08.

Dr Ndiouga und sini Jungs aus Party-Organisatore. Dr schneuscht Ufbou ever – Küse, da chönntsch öppis lerä

Ndiouga am uflege

Anti-Uswanderigs-Plakat

Juhu, dr Nachbar hett Wlan

Post vom 28.01.08.

• I ha ändlech glernt Mafe choche … und verschideni angeri Gricht. Chochschueu bir Ngotti – isch ds empfähle!
• Are Bar schaffe in Afrika isch nid ds gliiche wie im StuZ
• Mis erschte Meerbad sittem Jahr 2003
• Mi erscht Surf-Versuech. Äs hett mer nid ganz so passt wie erwartet, isch aber no steigerigsfähig
• Morn (29.1.) fani aafa schaffe. Ir Abwasserreinigungsaalag vo Dakar. Oder sägemer näbedrann, ir Forschigsaalag. Mau luege wie lang dassis cool finge mit Sch… ds arbeite I ha zuegseit bis Ändi März. Denn geits när hoffentlech (!!) los i di witti Wäut mit dr Christa
• I wirde dick! Hie isst mä so abartig guet und so abartig viu!! Hilfe! (Claud, du würdsches/wirsches liebe!)
• I ha ä nöii Telefonnummere: 00221 77 730 78 31. Sms si übrigens nid so tüür
• Ha ds erschte Mau Heiweh gha. Aber äs isch schnäu verbi gange… :-) Vor auem mini guete Lüt fähle mer!!!!!
• Ds Läbe hie choschtet viu meh ausi erwartet ha. Und d’Löhn entspräche däm überhoupt nid. Ä normale Lohn fürne Job ohni bsunderi Usbiudig isch um die 180 CHF im Monat. Das längt niene häre für d’Läbenschöschte ds zahle. Mä cha sech stritte öb sechs nun nid lohnt ds arbeite, oder öb 180.- geng no besser si aus gar nüt.
• Mis Wolof stagniert…
• Mi Nachbar hett Wireless – seehr geil – aber d’Leitig isch definitiv nid wasme vor ETH gwohnt isch
• Vo eire Region wo si Franzose hasse i di nächschti. Québec – Senegal. Blibt d’Frag weli meh Gründ drzue hei.
• Jede Tourischt würd lache weni würd verzeue wie wenig ig bis itz vo Dakar und dr Region ha gseh. Drfür gsehni so richtig wie d’Lüt läbe. Bi fang einisch ir Innestadt gsi und kenne drfür jenschti Quartier.

Bis gligli, Chrigä

Post vom 24.01.08. – und wüu’s so schön isch gsi no äs paar meh

Usflug uf d’Ile de Ngor – definitiv dr schönscht Platz in Dakar 

Post vom 24.01.08.

Ussicht vo Ngottis Dach und dr immerwährend Stou uf Dakars Strasse.

Post vom 20.01.08.

Ä grosse Event: Morgan Heritage spiut zum erschte Mau in Dakar. Im grosse Fuessbaustadion und d’Tickets choschte 5 CHF. Da cha ja nüt schief ga – chönnt me meine… Mir si scho am Abe am 7ni zum Stadion, d’Türe si natürlech no zue gsi. D’Schlange zum aaschta aber scho kilometerlang. Nachdäm mir üs ufem Schwarzmarkt Tickets für 6.25 CHF gchouft hei, simer nomau für äs paar Stund wäg gange. Am Abe am 11i simer de wieder zrügg, nume leider heisi d’Türe geng no nid uftaa. Hmm, was söu das? Uf dr Strass isch ei Tumult gsi. Lüt si umeghocket, umegstange und umegloffe und sofort hett sich ä Markt biudet wome hett chönne Frücht und Riis choufe. D’Nachfraag isch da gsi. Mir hei gwartet, gredt und glachet und irgendwenn hei si de o d’Tor ufgmacht und ds erschte Konzärt hett aagfange. Nume leider heisi nume 1 Tür ufgmacht… Und d’Schlange wo sich hett biudet isch fasch um ds ganze Stadion ume gange. Und wenn irgendwär wott bhoupte Afrikaner sige undiszipliniert, däm müessti widerspräche! Die Astahschlange isch nämlech ä Einerreihe gsi, wo d’Lüt anenanggchläbt si. Nüt vo chaotischem Aastah oder Füredrücke! Sich i die Schlange ds bschiisse wär schlicht unmöglech! I bi totau beiidruckt gsi. Schiinbar isch das säubschtverständlech so aaz’stah, mit dr Begründig: „äs wei ja aui ads Konzärt“. Äs isch aso definitiv ä spannende Aabä gsi. Nume leider hett mä no immer stundelang müesse aastah für ids Stadion inez’cho, am haubi 3, wo mir de si gange…

Was hani schüsch no gmacht: dr ganz Tag Fescht-mauh gchochet für ds muslimische Jahresändi, Wolof glernt en masse, und natürlech: umehocke … umehocke … rede … Tee trinke … ässe … umehocke … rede … umehocke … Tee trinke … ässe … Hilfeeee!

Grüessli,

Chrigä

Post vom 17.01.08.

Ngotti und ig, ufgstylt für anes Hochzyt

Ngotti und ihre Sohn Karim (chlini Schwöschter vom Ndiouga)

 Usflug nach Tivaoune

Post vom 17.01.2008

Blick id Strass woni wohne (uf dr Site vode Blueme)

Blick uf d’Strass gägenüber

Kafipouse in Lissabon

Post vom 17.01.2008

Samay xarit, Nagadef?

I la ä Wuche nach mire Aakunft mau ändlech öppis vo mir la ghöre. Ei Tag speter aus erwartet, nach ämne ung’wollte 24h-Kurztrip in Lissabon si mer guet hie aacho. Und sithär gsehni jede Tag so viu spannendi Sache dassi am Abe jewils fasch umgheie I weiss gar nid wo mit verzeue aafa, drum beschränki mi hie uf äs paar Pünkt.

Dakar isch riisig, lärmig, stoubig und ä Stadt im Ufbruch. Öppe jedi grösseri Strass isch ufgrisse und wird nöi bout, das heisst die riise Mängi Outos (bi teune stuunt me dass si überhoupt no fahre) macht ä Boge übere Sand und fahrt hinger ar Bousteu wieder witer. D’Foug da drvo isch Stou vom Morge bis am Abe, wo meischtens ohne jegläche Grund entstöh und wieder verbi sii. I wohne imne rächt schicke Huus imne eher schöne Quartier (Yoff), 5 min vom Meer und 3 min vom Flughafe. Dem europäische Nachtflugverbot sei Dank starte und lande hie d’Flüger vor auem zwüsche 2 und 4 am Morge, damit si zu de korrekte Zyte in Europa aachöme. Immerhin hetts hie nid so viu Flüg wie ire europäische Grossstadt

D’Lüt si umwärfend fründlech und vo Usländerfeindlichkeit ke Spur. Aui si sehr kommunikativ und lächle viu und weni mini Brocke Wolof fürenime hei si no viu mehr Fröid. Hüt hani ä Usflug uf ds Land gmacht, ca. 2 Stung nord-östlech vo Dakar imne Ort namens Tivaoune. D’Gägesätz si no viu krasser aus si innerhaub vo Dakar ds gseh si. Umegfahre wird nid mitem Taxi oder em Car rapide wie ir Stadt, sondern miteme Wägeli wo vomne magere, klapprige Pferd zoge wird. Wissi si viu säutener ds gseh aus in Dakar oder ar Küste, drum heimi aui Lüt aagluegt und d’Ching hei mir nachegrüeft. O wesi eim no so aastarre, wemä lächlet, de lächle si immer zrügg. Was mi am meischte stresst (näbem Durchfall, wo mi nach 4 Täg doch no erreicht hett) si die fixe Maa-Frou-Strukture. Aus Maa läbt sich’s definitiv guet in Senegal. Mä cha dr ganz Tag vorem Huus hocke, Tee trinke und grossi Redä schwingä und ds Ässe wird eim vor d’Nase gsetzt. Wüu Arbeit isch schwirig ds finde und weme mau eini hett, de mame doch nid jedä Tag am 5i ufstah, damit mä pünktlech bir Arbeit isch, wüu dr ewig Stou uf dr Strass d’Stunde verbruucht. D’Froue hocke während derä Zyt ir Chuchi, choche, ploudere und putze. Ds „Läbensziu“ vo dene Froue woni bis itz ha kenne glernt isch dementsprächend denn o guet ds choche, immer guet usdsgseh (sie si so was vo eitel!) und ihrem Maa ds gfaue, wüu wenn sie ihm nümm g’nüegt, de nimmt er sich haut ä angeri. Ja, d’Senegalesä si umwärfend fründlech, offe und unterhautsam, aber mit ihrne Gseuschafts-strukture hani scho chli Müeh.

Was hani bis itz aus gseh? Jenschti Quartier vo Dakar und ä Unmängi Lüt wo mit irgendwäm verwandt si, irgendwän kenne oder schüsch mit irgendwäm irgendöppis z’tüe hei. Ä Hochzyt wo ä härzigi jungi Senegalesin ä aute, dicke Franzos hett ghürate. Dr weschtlechscht Punkt vo Afrika mit sine schicke Gebäude. Ds Dorfläbe in Tivaoune. Ds Quartierläbe mit de umehockende Lüt und de chliine Lädeli. Ds Busfahre mit de ufdringleche Verchöifer. Ds Zentrum vo Dakar, wo häre’s mi definitiv nümm sofort zieht. Und ds Nachtläbe vo Dakar, woni ha müesse Chleider usleihe, damit i nid ganz underdressed bi… D’Gägesätz vo Stadt-Land si riisig und Dakar cha mit Usnahm vom Verkehrskonzept und em umeligende Abfau definitiv mit de europäische Grossstädt mithaute.

No churz zude Föteli: Kaffepouse in Lissabon; Blick uf üsere Strasse (i wohne uf dr Site vo de Blueme); Terrain gägenüber vo üsem Huus; Usflus nach Tivaoune; d’Ngotti (Ndiougas chlini Schwoscht) und ihre Sohn Karim; d’Ngotti und ig ufgstylt für ads Hochzyt.

Sowit so guet, dir ghöret wieder vo mir.

Ä Umarmig und ä dicke Schmatzer us Afrika,

Chrigä